ގދ. ފަރެސްމާތޮޑާ އަށް ފޭބުމާ އެކު ލޮލުގައި އަޅައިގަތީ 'ހައިރާނުގެ' ނަންބޯޑެކެވެ. ޖެހިގެން ހުރި 'ހިތާ ހެޔޮ ކެފޭ' ގައި ހޫނުކޮށް ހެޔޮވަރުކުރަމުން ދިޔަ ނާސްތާގެ ރަހަތައް ކުޑަދޮރުތަކުން ނުކުމެ ހިސާބުގަނޑު އެ އޮތީ ހިސާބަކަށް ކުޅުދިޔާކޮށްލައިފަ އެވެ. ބޮޑު އަކުރުތަކުން ގަތައި ބަނދަރުމަތީގައި ހަދާފައިހުރި ބިނާއެއްގެ މައްޗަށް އަރައި އޮތް ފަސްރޮނގުމަހެއް، ރަށުގެ ހޭޑިފޭޑީގެ ވާހަކަތައް ކިޔައިދޭން އައު ދުވަހަކަށް ފަރިވަނީ އެވެ.
ބަނދަރުމަތީގެ މި ހޭލަމޭލައިގެ ތެރެއަށް ސިކުނޑި ދަހިވެ، ބަނޑު ހައިވެފައި ވަނިކޮށް ބަގީއެއްގައި އައިސް ބާއްޖަވެރި ހެނދުނެއްގެ މި މަންޒަރަށް އެ މަޑުކޮށްލީ މިއަދުގެ ހާއްސަ މެހެމާނެވެ.
އޭނާގެ ނަމަކީ މުހައްމަދު މަނިކެވެ.
'ބުޅިމަނިކު' ގެ ނަމުން މުޅި އަތޮޅަށް މަޝްހޫރުވެފައިވާ މި ޝަހުސިއްޔަތަކީ ހުވަދޫ އަތޮޅަށް ކުރަމުން މިދާ ދަތުރުގައި ހަމަ ރަނގަޅަށް ވެސް އަޅުގަނޑު ހައިރާންކޮށްލި އެއް ތަޖުރިބާކާރެވެ.
އޭނާގެ ހިތަކީ ހަގީގަތުގައި ވެސް 'ހިތާ ހެޔޮ ކެފޭ' އެއްގެ އެންމެ ފުރިހަމަވެގެންވީ ނަމޫނާ އެކެވެ. އަދި ރަށުގެ މާތޮޑާ އަވަށުގައި އޭނާ ދިރިއުޅޭ 'ބިނާ' އަކީ ހަމައެކަނި އޭނާގެ 65 އަހަރުވީ ހަޔާތުގެ ހިތްވަރާއި ކާމިޔާބީގެ ވާހަކަ ކިޔައިދޭ ގެދޮރެއް ނޫނެވެ. ނަމަވެސް ފަސްރޮނގުމަހާ ދިވެހިންގެ ލޭނާރު ގުޅުވައިދޭ ފަސްމީރުކުރިރުކެކެވެ.
މަނިކަކީ ކަޅުބިލަ މަސްވެރިކަމުގައި ދިވެހިން މިއަދު ބޭނުންކުރާ އެންމެ މަގްބޫލު ސަތޯ ބުޅި އާއި ހަވާއީ ބުޅީގެ އެންމެ ވަރުގަދަ މޭސްތިރިޔާ އެވެ. ބުޅިޖެހުމުގެ ހިދުމަތުން ހިތްވަރު ދިނުމުގެ އިނާމާއި ޝަރަފުވެރިކަމުގެ ގައުމީ އިނާމު ލިބިވަޑައިގެންފައިވާ ތަޖުރިބާކާރެކެވެ.
ނަމަވެސް އޭނާގެ ކަނބުރުގޭގައި ދޮންކޮށް ފަންވަރުޖަހަމުންދާ އެ ބުޅިތަކުގައި މި އިންޓަވިއު ބޭނުމުގެ ކުރިން 'ބިނާ' ގައި އޭނާގެ އަންހެނުން ތައްޔާރުކޮށްފައި ހުރި ނާސްތާގެ ރަހަތަކުން ފަށަމާ ހިނގާށެވެ.
ހުނިރޮއްޓާއި ބަނޑައިދުލެވެ. ތެލުލިމަހާއި ތެލުލިފަތާއި ތެލުލިރިހާކުރެވެ. ލޮނުމިރުހާއި ބޮޑު ލުނބޮޔާއި ދިލަފިޔަޔާއި ތޮޅިމިރުހެވެ. ފަރުތޮޅިޔާއި ފަސްރޮނގުމަހުގައި ކައްކާފައިހުރި ހޫނު މީރު ގަރުދިޔަ އެވެ. ކާމިޔާބީގެ ލޮނުހެޔޮވަރުކޮށްދޭ ހުރިހާ ރަހައެއް އެހެން ނޫންތޯ އެވެ. އަދި ފަހަރަކު ރަހައަކުން މަނިކު އޭނާގެ ވާހަކަ ފަށައިގަތެވެ.
"އަޅުގަނޑަކީ ވަރަށް ގިނަ ނާކާމިޔާބު މަސައްކަތްކުރާ މީހެއް،" މަލުގެ ކުރެހުން އެޅި ސެރަމިކު ތައްޓަކަށް ކޮށައި ކުދިކުރަން ފެށި ހުނިރޮއްޓާއެކު މަނިކު ފަށައިގަތީ ހަޔާތުގެ ދަތުރު އޭނާގެ ކުރިމައްޗަށް ހޫރާލި އަރަތް އޮޅުންފިލުވައި ތަރުތީބުކޮށްދޭށެވެ.
"ބައިވަރު އެއްޗެހި ހުންނާނެ އަޅުގަނޑު އަތުން ހަލާކުވެފައި. އެކަމަކު އަޅުގަނޑު އަބަދުވެސް ބޮލަށް ލައިގެން ގެންގުޅުނު ވިސްނުމަކީ، ކިތަންމެ ގިނަ ފަހަރު ނާކާމިޔާބުވިޔަސް އަޒުމު ދޫކޮށްނުލުން. ހުވަފެން ކާމިޔާބުވަންދެން ހިތްވަރު ދޫނުކޮށް މަސައްކަތްކުރުން."
މިހެން ބުނެލުމަށް ފަހު ގަރުދިޔައާ އެކު ހުނިރޮށިތަށި އޭނާ ރަނގަޅަށް މޮޑެލައިފި އެވެ. ފިޔާމިރުހާއި ލުނބޯގެ ހުތާއި އޭގެ ދިލައިން އަހަރެން ކޮށިއަރައިގަތެވެ. މަނިކު އޭރު ކިޔައިދެމުން ދިޔައީ ހަޔާތުގެ ދަތުރަށް އޭނާ ހޭލެއްވި ބިރުވެރި ހުވަފެނުގެ ވާހަކަ އެވެ.
އެ ހުވަފެނުން އެއް ދުވަހަކު އޭނާ އަށް ހޭލެވުނީ ނިކަން ގަދަ ހުމެއްގައި މުޅި ހަށިގަނޑު އަނދާތީ އެވެ. ހަތަރެސްފައި ހިރިނުލެވިގެން އުޅޭތީ އެވެ. ނިދިން ހޭލައިގެން ތެދުވަން އުޅެއުޅެ އެ ދުވަހު އޭނާ އަށް ތެދުވެވޭ ގޮތެއް ވެސް ނުވި އެވެ.
ހުވަފެންތައް ފަހަތުން ދުއްވައިގަތުމަށް ތައްޔާރުވަމުން ދިޔަ އުމުރުން 8 އަހަރުގެ މަނިކަށް ޕޯލިއޯ ޖެހުނީ އެވެ.
"ދެން ހައެއްކަ އަށެއްކަ މަސް ފަހުން އަނެއްކާވެސް ހަރަކާތެއް ކޮށްލެވޭވަރުވީ. އަހަރެއް ދޮޅު އަހަރެއްހާ ދުވަސް ނެގި އާންމު ހާލަތަކަށް ގޮސް އަލުން ހިނގާބިނގާވެ އުޅެން."
ކައި ނިމިގެން ދުފާލައިގެން މަނިކު އޭނާގެ އިލެކްޓްރިކް ގޮނޑީގައި ނައްޓާލައިފި އެވެ. އަހަންނަށް ދެވުނުއިރު އޭނާ ތައްޔާރުވަމުން ދިޔައީ ބުޅިޖެހުމުގެ މަސައްކަތް ތަރުތީބުކޮށްފައިވާ ގޮތާއި ދުވާލެއްގެ މައްޗަށް 4000ރ. ގެ ބުޅި ތައްޔާރުކުރާ ގޮތުގެ ޓުއާ ފަށަންށެވެ.
އެކަމަކު މަޑުކޮށްބަލާށެވެ. -- ބުޅިޖެހުން މިއީ މަނިކުގެ ހީވާގި ހަޔާތުން ފާހަގަކޮށްލެވޭ އެއް ހުނަރެވެ. އަދި އޭނާގެ ކުޅަދާނަކަމާއި މަސައްކަތްތެރިކަމުގެ ވާހަކަ އޮތީ ހަމައެކަނި މި ކަނބުރުގެއަކު ނޫނެވެ.
ޕޯލިއޯގެ ގަދަހުންގަނޑު މައިތިރިވެ ހެލިފެލިވެ އުޅެވޭވަރުވިތަނުން އޭނާގެ މަންމަ އޭނާ ގޮވައިގެން ގޮސް ވެއްދީ ޅިޔަނެއްގެ ކަނބުރުގެއަށެވެ. މަރުތޭލަކުން މޮހޮރުޖަހަން ދަސްކުރިހާ ފަސޭހައިން އޭނާ އެ ކަނބުރުގޭގައި ކުރަން ޖެހުނު އެހެން ހުރިހާ ކަމެއް ވެސް ފަސޭހަކަމާ އެކު ދަސްކޮށްފި އެވެ. އަދި އެ ކަނބުރުގޭގައި ބުޅިޖަހަން ފެށުމުގެ ކުރިން އޭނާ ދެން ދަސްކުރީ ދައުބަންނާށެވެ.
އުއި ހޯދައިގެން، ސަރަކައިން ރޮދިއޮޅައިގެން އޭނާ ގެތީ އެންދަމަން ބޭނުންކުރާ 26 ފޫޓުގެ ދަލެކެވެ.
"އޭރު އަޅުގަނޑުގެ އަތުގައި އޮންނާނެ އަޅުގަނޑު އަމިއްލަ އަށް ބަން ދަލަކާއި ބައްޕަ ދެއްވާފައި އޮތް އެންދަމާ ދަލައެއް. އޭރު ހަތް މީހުންނާ އެކު މަހަށް ފުރާ މަސްދޯންޏެއްގައި އުޅޭ މޮޅު މީހަކަށް އާންމުކޮށް ލިބޭނީ ދެބައި މަސް،" ފުރަތަމަ މަސައްކަތުން ލިބުނު އާމްދަނީގެ ހަނދާންތަކާ އެކު މަނިކު އުފަލުން ފޮޅިއްޖެ އެވެ.
"އެއީ ބުޅިޖަހަން ފެށުމުގެ މާ ކުރިން. އެ ދެ ދަލަށް އަޅުގަނޑަށް ލިބޭނެ އޭގެ މޮޅު މަސްވެރިޔަކަށް ލިބޭ ވަރުގެ މަސްބައެއް. އޭރު އަޅުގަނޑުގެ އުމުރަކީ 11 އަހަރު."
އޭގެ އަހަރެއްހާ ދުވަސް ފަހުން އޭނާ މަސްދޯނިތަކަށް އޯޑަރަށް ބުޅިޖަހަން ފަށައިފި އެވެ. ހަފުތާއަކު 10 ވަރަކަށް ބުޅި އެވެ. އޭގެ ކޮންމެ އޯޑަރަކަށް މަސްބައެއް ލިބެން ފަށައިފި އެވެ. ގޭގައި ތިބި ކެޔޮޅުންނަށް ވުރެ ގިނައިން އޭނާ އަށް މަސްބައި ލިބެން ފެށިއިރު އުމުރުން 13 އަހަރެވެ.
ޖެހިގެން އައި އަހަރު ރަށު އޮފީހުގެ ކާތިބުކަމުގެ ވަޒީފާއާ ވެސް އޭނާ ހަވާލުވެއްޖެ އެވެ. އެންމެފަހުން ރަށުގައި ކުދިންނަށް ކިޔަވައިދިނުމުގެ ހިދުމަތުގެ ތެރެއަށް ވެސް ވަދެވިއްޖެ އެވެ. ކާތިބުކަމުން ފެށި ސަރުކާރު ވަޒީފާގެ ދަތުރުގައި މެނޭޖަރު ލެވެލްގައި ވެސް ފަހުން މަސައްކަތްކޮށް ރަށު ފެންވަރުގައި ހިދުމަތްކުރި އެވެ.
އެ ހުރިހާ މަގާމުތަކާއި މަސްއޫލިއްޔަތުތަކެއް ވަކި ހިސާބަކުން އޭނާއާ ވަކިވެގެން ދިޔަ ނަމަވެސް ހިތާއިހިތުގެ ގުޅުމެއް އުފެދިފައި އޮތީ ބުޅިޖެހުމުގެ މަސައްކަތުގައި އެކަންޏެވެ. އަދާކުރަމުން ދިޔަ ވަޒީފާތައް އެންމެފަހުން ދޫކޮށްލީ ވެސް ސީދާ ފުލްޓައިމްކޮށް ބުޅިޖެހުމަށެވެ.
"އިރާދަކުރެއްވިއްޔާމު އޭރު ފެށި މަސައްކަތުގައި އަދިވެސް މެދުކެނޑުމެއް ނާދޭ. އަޅުގަނޑު ބަލިވިޔަސް މަސައްކަތް މެދުކަނޑާލާހާ ވަރުގެ ބައްޔެއް ނުވޭ. މިހާރު އެއްގޮތަކަށް ވެސް ހިނގާބިނގާވެ ނޫޅެނީ ޗިކުންގުންޔާ ޖެހިގެން ޑޮކްޓަރު ނުހިނގަން ލަފާ ދީފައި އޮތީމަ،" މަނިކު ބުނެލި އެވެ.
"އިރާދަކުރެއްވިއްޔާމު އެއްވެސް ކަމެއް އުނދަގުލެއް ނޫން އަޅުގަނޑަކަށް. އެހެންވީމަ ބަލި މީހެއް ކަމުގެ އިހުސާސެއް ވެސް އަޅުގަނޑަކަށް ނުވޭ ދުވަހަކުވެސް. ކިރިޔާ ވެސް އަތްފޯރާ ކަމުގައި ވަނީ ނަމަ އަމިއްލަ އަށް ކޮންމެތަނަކަށް ވެސް އަރާފާނެ ކަހަލަ މީހެއް އަޅުގަނޑަކީ."
މަނިކުގެ ކާމިޔާބީގެ ސިއްރަކީ ވެސް އެއީ އެވެ. އެއް ތަނެއްގައި މަޑުން ނުހުރެވުމެވެ. ނުވަތަ ބަންދުވެފައި ހުންނަން ބޭނުންނުވުމެވެ.
"މީހަކު އަޅުގަނޑަށް ދިން ނަސޭހަތެއްގައި ބުނީ، ނާކާމިޔާބީ އަކީ ދިރިއުޅުމުގެ ދަތުރުގައި އޮންނަ އެއްޗެކޭ. އެކަމަކު އެ ނާކާމިޔާބީ ގަބޫލުކޮށްގެން ނުވާނެއޭ،" މަނިކު ކިޔައިދިނެވެ.
"މާނަ އަކީ ކަމަކާ ކުރިމަތިލައިފިއްޔާމު ކާމިޔާބީ އަކީ ތިމަންނަގެ ޒިންމާއެއްކަން ދަނެގެންނޭ މަސައްކަތް ކުރަން ޖެހޭނީ. ކާމިޔާބުވާވަރަށް މަސައްކަތްކުރަން ޖެހޭނެއޭ މަސައްކަތަކާ ކުރިމަތިލައިފި ނަމަ."
މިހެން ބުނެފައި މަނިކު ކިޔައިދޭން ފެށީ އޭނާގެ ބުޅިޖެހުމުގެ ދިގު ދަތުރު މިއަދު ފަސޭހަވެ އެ މަސައްކަތް އޭނާގެ ދިރިއުޅުން ކޮޅަށް ޖަހައިދިން ހަގީގަތެވެ. އަދި އެ ވާހަކަތައް ފަށައިގަތުމާ އެކު އޭނާގެ ކާމިޔާބީގެ މި އިންޓަވިއުގައި ބުރު ފުރިހަމަވީ އެވެ.
"ބަލަ. އަޅުގަނޑަކީ ވަރަށް ގިނަ ނާކާމިޔާބު މަސައްކަތްކުރާ މީހެއް އަބަދުވެސް. ޓެސްޓަށް، ތަޖުރިބާކޮށްލުމަށް ވަރަށް ގިނަ އެއްޗެހި ހަދާފައި ހުންނާނެ ހަލާކުވެފައި. އެކަމަކު އަޅުގަނޑު އަބަދުވެސް ބެލީ އެއްގޮތަކަށް ނުކުރެވިއްޖެ ނަމަ އެހެން ގޮތަކުން ވެސް އެ މަސައްކަތެއް ކުރަން،" ބުޅިޖެހުމުގެ މަސައްކަތް ވެސް ފުރިހަމަކުރީ އަމިއްލަ އަށް ޓެސްޓްކޮށް އުފެއްދި ގިނަ އާލާތްތައް ބޭނުންކޮށްގެން ކަމަށް ބުނެ ކިޔައިދެމުން މަނިކު ބުންޏެވެ.
"އެއް ފަހަރަކު އެއްޗެއް ތޮރުފަންވެގެން ބުރުމާ ކައްޓެއް ހެދީ އަމިއްލަ އަށް. ފުރަތަމަ ތޮރުފަން ޖައްސާލިތަނުން ކަށި ބިންދައިގެން ހިނގައްޖެ. ދެ ވަނަ އަށް ވެސް ބިންދައިގެން ހިނގައްޖެ. ހަމަ ކޮންމެ ފަހަރަކު ވެސް ބިންދައިގެން ދަނީ"
"ދެން އެ ދުވަހު މި ކަށި ހައެއްކަ ފަހަރު ބިނދިއްޖެ. އެކަމަކު ޖެހިގެން އައި ދުވަހުގެ ހެނދުނު އަނެއްކާ ފެށީ އެ މަސައްކަތުން. ދެން އަޅުގަނޑާ އެކު މަސައްކަތުގައި އުޅުނު މީހާ ބުނެފި ތިކަން ނުވިއެއް ނޫން ހެއްޔޭ މިހާރު ދެ ވަނަ ދުވަހޭ މިއީ"
"ދެން މަ ބުނެފިން އަހަރެން ހުއްޓާލާނީ ހަފުތާއެއްކޮށްފައޭ. މިކަން ކާމިޔާބުކުރަން ހިތުލައިގެންނޭ މި ފެށީ. އެހެންވީމަ މިކަން ކާމިޔާބުނުވަނީސް ނުހުއްޓާނަމޭ މަށެއް. އޭގެ ބަރާބަރު ތިން ވަނަ އަށްވީ ދުވަހު އެކަން ކާމިޔާބުކޮށްފިން."
އެއީ އޭނާ ތައްޔާރުކުރާ ބުޅިތައް ވަކި ސައިޒުތަކެއްގައި ތައްޔާރުކުރުމަށް ހެދި ތައްގަނޑު އުފަންވުމުގެ އެންމެ މުހިންމު އެއް އާލާތެވެ. އެ ދުވަހު އެ ކަށި ތައްޔާރުކުރުމުގެ މަސައްކަތް ހުއްޓާނުލައި ގޮސް ކާމިޔާބުކުރީމަ މިއަދު އޭނާ ތައްޔާރުކޮށްފައިވާ ތިމަރަ ތައްގަނޑަކީ އޭނާގެ މި ވިޔަފާރީގެ އެންމެ އަގުބޮޑު އެއް ރައުސްމާލެވެ.
"އަޅުގަނޑު ބުޅިޖަހަން ބޭނުންކުރާ ގިނަ ޓޫލްސްތަކަކީ އަމިއްލަ އަށް ތައްޔާރުކޮށްފައި ހުންނަ އެއްޗެހި. މިހާރު މި މަސައްކަތުގައި ނުޖެހޭ ގަޔަށް އެނގޭ ވަރުގެ އެތިފަހަރެއް މަރުތޭލަކުން ޖަހާލާކަށް ވެސް،" މިހެން ބުނެފައި މަނިކު ދައްކާލީ ތޫނުކޮށް ނިންމާލި ބުޅިއެކެވެ.
އޭނާ މިއަދު ވެސް އޭގެ 1000 ބުޅިޖަހާނެ އެވެ.
އިންޓަވިއު ނިމިގެން، މަނިކުގެ މި އާދަޔާހިލާފު ހަޔާތާ މެދު ފިކުރުތައް ތޫނުކުރަމުން އެހެން ސަޅި ސްޓޯރީއެއް ހޯދަން ހިނގައިގަތްތަނުން އަހަރެންގެ ލޮލުގައި އަނެއްކާވެސް އަޅައިގަތީ އެއްކަހަލަ ނަންބޯޑެވެ.
ތެދެކެވެ. ފަރެސްމާތޮޑާ އިން ހައިރާންކޮށްލައިފި އެވެ. އަދި މިއީ އެހާ 'ހިތާ ވެސް ހެޔޮ' ރަށެކެވެ.
ވާދޫ އަށް ދޫވި ހިތް، ފަރެސްމާތޮޑާ އިން އެ ބޭނީ ސަތޯބުޅިއެއްގަ އެވެ.
